Kif jissuġġerixxi isimhom, it-teknoloġiji tal-immarkar jaħdmu billi jimmarkaw il-prodotti b'karatteristiċi ta' sigurtà uniċi, l-aktar mudelli grafiċi jew kodiċijiet.

L-iskop ewlieni huwa li jawtentikaw aktar milli jidentifikaw prodotti individwali. Is-sigurtà li jipprovdu kontra r-riproduzzjoni u t-tbagħbis ġejja jew min-natura tat-teknoloġija nnifisha (eż. il-karatteristiċi kimiċi u fiżiċi ta' linka) jew mill-informazzjoni li fiha (eż. f'disinn grafiku). Fl-ewwel każ, is-sigurtà hija pprovduta minn indikazzjoni viżwali ta' tentattiv ta' alterazzjoni filwaqt li, fit-tieni każ, is-sigurtà ġejja mid-diffikultà tal-ikklonjar jew ir-riproduzzjoni tal-informazzjoni.

F'xi każijiet – fejn kodiċi uniku (eż. barcode) jifforma parti minn jew it-teknoloġija tal-immarkar kollha (jew jista' jiġi inkorporat fiha) – jistgħu wkoll jappoġġjaw it-traċċabilità tal-prodott billi jagħmluha possibbli li l-prodotti jiġu rreġistrati hekk kif jimxu tul il-katina tal-provvista.

Hemm diversi tipi differenti ta’ teknoloġiji tal-immarkar. L-aktar użati huma dawk li jistgħu jiġu spezzjonati viżwalment minħabba l-varjetà tagħhom, l-ispiża baxxa għal kull oġġett u l-proċeduri ta’ verifika sempliċi – f’ħafna każijiet, il-verifika tista’ titwettaq permezz ta’ spezzjoni viżwali jew permezz ta’ smartphone.