Din it-teknoloġija kontra l-falsifikazzjoni tuża partiċelli żgħar bi proprjetajiet kimiċi jew fiżiċi speċifiċi biex tawtentika u tiżgura l-prodotti u l-imballaġġ. Dawn il-partiċelli jistgħu jitwaħħlu ma’ kwalunkwe tip ta’ wiċċ u huma inviżibbli għall-għajn. Madankollu, il-proprjetajiet uniċi tal-partiċelli – pereżempju reazzjoni tal-kulur għad-dawl – jistgħu jiġu skoperti bl-użu ta’ tagħmir speċjali. Il-partiċelli jistgħu jiġu applikati f’disinji speċifiċi biex iservu bħala markatur tal-oriġini, jew għal ċerti komponenti biex iservu bħala markatur tal-kwalità. Pereżempju, jekk biċċa ħwejjeġ suppost tkun 40% qoton, traċċatur kimiku jista’ jiżdied mal-ħajt tal-qoton fil-bidu tal-proċess tal-produzzjoni. Aktar tard, anke snin wara li l-ilbies ikun inxtara u ntuża, qarrej speċjali xorta jkun jista’ jkejjel l-ammont ta’ traċċatur kimiku preżenti biex jivverifika l-kontenut tal-qoton.
Il-kodifikazzjoni u t-traċċaturi kimiċi jaħdmu billi jwaħħlu partiċelli kimiċi żgħar speċifiċi u distintivi ma' materja prima u prodotti lesti li, meta jinstabu, jixhdu l-awtentiċità tal-materjal/prodott. Huma nanometri (nm), jiġifieri, biljuneżmi ta' metru, fit-tul u jistgħu jiġu identifikati biss bl-użu ta' qarrejja speċifiċi. Il-partiċelli kimiċi huma kkodifikati, bid-dekodifikazzjoni kollha ssir f'laboratorju.
Jeżistu diversi metodi differenti kodifikazzjoni kimika . Xi wħud jużaw komposti kimiċi bi proprjetajiet ottiċi, bħal partiċelli luminexxenti, biex jawtentikaw il-prodott, filwaqt li oħrajn jużaw komposti bi proprjetajiet fiżiċi, bħal partiċelli li jistgħu jiġu attirati manjetikament.
Din it-teknoloġija għandha qasam ta' applikazzjoni wiesa' ħafna peress li l-partiċelli kimiċi li tuża jistgħu jitwaħħlu ma' varjetà wiesgħa ta' materjali differenti, inklużi karta, kartun, plastik, ġilda, ħġieġ, ħajt u drappijiet.
Id-diversità tal-materjali u l-metodi applikabbli għall kodifikazzjoni kimika u t-traċċaturi tagħmilha diffiċli li jiġu speċifikati r-rekwiżiti għall-implimentazzjoni ta' din it-teknoloġija. Kwalunkwe bidla li trid issir fil-proċess tal-produzzjoni tiddependi fuq il-prodott/materjal tiegħek, il-metodu li tagħżel u t-teknika tat-twaħħil tal-partiċelli.
Billi r-riżorsi meħtieġa għall kodifikazzjoni kimika jiddependu ħafna fuq il-metodu u l-prodott partikolari użat, huwa diffiċli li tingħata idea ġenerali tal-ispejjeż involuti fl-implimentazzjoni ta' din it-teknoloġija.